Abdul Hameed Adam Sufi Shayari

Wo Jo Teray Faqeer Hotay Hain,
Aadmi Bay-Nazeer Hotay Hain.

Teri Mahfil Mein Bethnay Waalay,
Kitnay Roshan Zameer Hotay Hain.

Phool Daaman Mein Chand Rakh Lijiye,
Raastay Mein Faqeer Hotay Hain.

Zindagi Kay Haseen Tarkash Mein,
Kitnay Bay-Rahm Teer Hotay Hain.

Wo Parinday Jo Aankh Rakhtay Hain,
Sab Say Pehlay Aseer Hotay Hain.

Daikhnay Waala Ek Nahi Milta,
Aankh Waalay Kaseer Miltay Hain.

Jin Ko Daulat Haqeer Lagti Hai,
Uff! Wo Kitnay Ameer Hotay Hain.

Jin Ko Qudrat Nay Husn Bakhsha Ho,
Qudratan Kuch Shareer Hotay Hain.

Hai Khushi Bhi Ajeeb Shay Lekin,
Gham Baray Dil-Pazeer Hotay Hain.

Ay ADAM Ehtiyaat Logon Say,
Log Munkar Nakeer Hotay Hain.